Hæ, ég heiti Guðdís
Ég hanna og framleiði skemmtilegri skartgripi með áherslu á nostalgíu úr íslenskri menningu, mat og drykk. Allt þetta fer fram á vinnustofunni minni á Eskifirði. Hver einasti lokkur er mótaður, bakaður og settur saman í höndunum.
Hvað er Dálæti?
Skartgripirnir mínir eru fyrst og fremst skemmtilegir. Ég legg áherslu á nostalgíu og gleði, og vinsælustu lokkarnir eru þeir sem minna á góðgætið sem við ólumst upp með.
Allir gripir eru framleiddir og samsettir á Íslandi. Markmiðið er litríkir, fallegir og skemmtilegir skartgripir sem þú getur líka notað til að tjá þig. Leiktu þér, sýndu stuðning og vertu nákvæmlega eins og þú vilt vera.
Fæddist í fæðingarorlofi
Ég hef alltaf haft gaman af alls konar dundi og er meðal annars lærður naglafræðingur, bæði í gel og akrýl. Það reyndist ágætis grunnur fyrir skartgripagerðina.
Dálæti fæddist í fæðingarorlofi og hefur vaxið hægt og rólega síðan, og breyst heilmikið á leiðinni. Lengi vel bjó ég lokkana til meðfram annarri vinnu, en í dag sinni ég Dálæti í fullu starfi.
Bakgrunnurinn minn er annars í tæknigeiranum, þar sem ég vann lengst af við sölu, fyrirtækjaþjónustu og tækniþjónustu.
Frá Keflavík til Eskifjarðar
Ég er fædd í Keflavík árið 1986 og ólst upp á Sauðárkróki. Öll fullorðinsárin bjó ég á höfuðborgarsvæðinu en er núna lent á Eskifirði.
Það er ekki alveg jafn fáránlegt og það hljómar, því ég á ættir að rekja á Austfirði. Hér er vinnustofan, og hingað koma allar pantanir áður en þær leggja af stað um landið.
Dálæti í Landanum
Landinn kíkti í heimsókn á vinnustofuna og fylgdist með því hvernig eyrnalokkarnir verða til. Innslagið var sýnt 1. mars 2026 og byrjar á mínútu 24:44.
Sérpantanir
Ég tek að mér að sérhanna skartgripi fyrir stóra sem smáa viðburði. Ertu með hugmynd eða vantar ráðgjöf?
Átt þú verslun?
Passar Dálæti í hillurnar þínar? Sendu fyrirspurn og ég hef samband.